مشغله اغاني

كنت قاعدة مشغلة أغاني وبرقص، وفجأة الباب اتفتح وابن عمّي عبدالرحمن دخل وهو بيزعق وينادي عليا. خرجت من أوضتي مستغربة: ـ إيه في إيه بتزعق ليه؟ بص لي بعصبية: ـ هو أنا كلامي مبيسمعش ولا إيه؟ ماما دخلت وهي متضايقة: ـ في إيه يا بني؟ حصل إيه؟ قال وهو عينيه مثبتة عليا: ـ هو أنا مش قولت تبطل تنزل صورها في كل حتة؟ رديت ببرود: ـ وانت مالك! مين أنت عشان تمنعني؟ أبويا؟ أخويا؟ قرب مني وقال بجمود: ـ ابن عمك يا ملك. ـ إي يعني ابن عمي! طالما مش أبويا ولا أخويا يبقى ملكش حكم عليا. بص لي بعصبية وخرج ورزع الباب وراه. ماما بصت لي بزهق: ـ احنا مش هنخلص من مشاكلكوا انتو الاتنين، اسمعي الكلام وبطلي تنزلي صور. ـ ماما هو ملوش دعوة بيا، وأنا عارفة بعمل إيه. ـ اعملي اللي يريحك… أنا تعبت. دخلت أوضتي وأنا متعصبة. بعد شوية جالي مسج من ريم بنت عمي: ـ إيه اللي حصل تاني؟ عبدالرحمن طالع مش طايق نفسه و دخل الأوضة ورزع الباب. رديت عليها: ـ معرفش، خلي أخوكي يفك مني شوية بدل ما مركز معايا. تاني يوم الصبح، كنت واقفة في الصالة، ماما في المطبخ، والجرس رن. فتحت… لقيته واقف. ـ أفندم؟ ـ صباح الخير… كنت رايح مشوار قريب من جامعتك قلت أعدي أشوفك لو رايحة أخدك. ـ لا شكراً مش راحه. ماما طلعت: ـ ادخل يا بني. دخل وسلّم، وقال نفس الكلام. ماما استغربت إني قلت مش رايحة، مع إني كنت قايلة عندي محاضرة. حاولت أتهرب، لكن ماما أصرت. طلعت ألبس وانا مش طايقةنفسي، بعد شوية نزلت لقيته بيتكلم مع ماما بهدوء، ولما شافني قام: ـ يلا. ركبنا العربية، والطريق كله كنت ساكتة. ـ مالك ساكتة كده؟ اتكلمت بقرف شوية: ـ اعمل ايه يعني ـ شكلك زعلانة لسه… أنا مش قصدي أزعلك، أنا بس بخاف عليكي و... سكت، وكأنه كان هيكمل كلام مهم بس وقف. وصلنا قلت له: ـ شكراً على التوصيلة. ابتسم وقال: ـ ولا يهمك يا قمر… لسه هنزل من العربية اتكلم وقال: ملك. بصيت له: ـ نعم؟ ـ أنا آسف. ابتسمت وقولت حصل خير نزلت وأنا تايهة هو ليه بيعمل كدا ليه بيعمل الفعل وعكسه معايا وأنا ماشية ناحية بوابة الجامعة، سمعت صوته: ـ ملك! التفت لقيته نازل وبيجري ناحيتي. ـ إيه تاني؟ ـ في حاجة لسه مقلتهاش. وقف قدامي، وصوته بقى أهدى: ـ يمكن أكون بغلس وبزودها، بس كل ده عشان أنا… سكت شوية وبعدين قرب مني وقال بحب وهيام وهو باصص فعيني: -بحبك. اتجمدت مكاني، قلبي دق بسرعة. ـ إيه؟ ـ أيوه… بحبك من زمان، حتى وإحنا بنتخانق. كنت فاكر إني بحميكي، بس الحقيقة انا كدا ممكن اخسرك و انا مش قادر أتخيل حياتي من غيرك. ابتسمت بخجل، وقلبي كان بيغني: ـ يعني كل النكد ده… عشانك؟ ـ أيوه… وهفضل غلس طول حياتي. ضحكت، ومسك إيدي، لأول مرة حسيت إني مش زعلانة من خناقنا… يمكن لأنه كان بداية حاجة تانية خالص. #روايات_واسكريبتات_مميزة #اسكريبت

مقالات ذات صلة

حماتي

عامله النظافة

بعد الطلاق

رقصة النادلة الأخيرة مع زعيم المافيا ❤️ حكايات شروق خالد

بنتي

حكايات شروق خالد ج2

اترك تعليقاً إلغاء الرد