نلعب لعبه

تيجي نلعب لعبة؟ _ تمام اوي، لعبة إيه؟ - هغني أغنية وهقف عند مقطع معين وتكملي ماشي؟ _ ماشي، يلا إبدأ - بِه فتحة با.. _ بحبك! - وأنا كمان ولله _ بس دي مش التكملة - هشش لا هي هي، دانا متربي على أغاني صباح حتى، أيش فهمك إنتِ بس إبتسمت بخجل لكلامه وهمستله : "أمير!" _ "عيونه والله" - "بطل كلامك دا، أنا بتكسف" غمزلي وبعدين إتكلم : "كلها شهرين ونتجوز يا لولو و... قطعت كلامه بعصبية : "كام مرة أقولك متقوليش لولو دي، إنت بتدلع الكلـ.ـب بتاعك؟" _ "يوه أومال اقولك إيه يعني؟" - "ليل، قولي ليل..". _"ماشي يا ست ليل، يلا نشوف ايه ورانا بقى" بِس بِس.. أنا ليليٰ، ليلىٰ نديم، في سنة رابعة كلية بيزنيس، ودا أمير، خطيبي، مرتبطين بقالنا أربع سنين، يعني تقريبًا من أولى كلية بما إنه كان معايا في نفس الكلية بس أكبر مني بسنتين، وأخيرًا وإتخطبنا من سنة واحدة وفرحي بعد شهرين خلاص! كنا بننقي الفستان والبدلة عشان نلحق نحجزهم ليوم الفرح، وفعلًا حجزنا بدلته وناقص فستاني! من صغري وأنا بحلم بفستان ملكي، مش زي أي فستان، وكأني طالعة من الأفلام.. أميرة جميلة أخيرًا هتتجمع مع أميرها المِقدام، هعوز إيه بعد كدا؟ جايز تعلقي المبالغ بأمير دا لإن عندي تراست إيشوز "مشكلة في الثقة بالنفس وباللي حوليا" مبقتش عارفة أدي الأمان للبشر من يوم ما ماما وبابا إتطلقوا وسابوني لوحدي أتربى مع جدتي المُسنة وكل واحد شاف حياته وإتجوز ونسيوني أنا!، نسيوا غلطة تجربتهم!، نسيوني وكأني لم أكن. بس.. بس أمير إقتحم حياتي وهدم العُقدة دي، وقدر بسهولة يبقى محور حياتي، وللحقيقة.. لو عيشت العُمر كله أدور مش هلاقي زيه تاني. لفينا كتير وملقيتش ولا فستان عاجبني فـ قولنا نروح وننزل بكرة ندور تاني، وفعلًا روحني بعربيته وكنت خلاص هطلع بس.. _ ليلى لفيت وشي لُه بعد ما قفلت باب العربية فإتكلم : هنفطر سوا بكرة قبل ما نروح نلف لفتنا؟ هزيتله راسي وإبتسمت وأنا بتكلم : ماشي، هنتقابل هنا هزلي راسه بوِد وبدأ يتحرك وأنا كمان طلعت شقتي، أو بمعنى آخر شقة جدتي.. فتحت الباب ودخلت لاقيتها قاعدة كعادتها ماسكة الإبرة والخيط وبتخيط "تريكوه"، قربت منها وبسرعة حضنتها من ضهرها وأنا بهمس : "بتعملي إيه يا زوزو" طبطبت بإيدها على إيدي وردت : "وأنا بعمل أيه غيرُه يعني؟" سكتت شوية وبعدين كملت : "أه صح، نسيت أوريكي دا" قالتها وطلعت من ورا ضهرها شنطة صوف فيها ألوان مبهجة ولطيفة، من الواضح إنها هي اللي مخيطاها، وعشاني! _ ها إيه رأيك؟ أقل ما يوصف شعوري وقتها إن بالمعنى الحرفي عيوني بتطلع قلوب!! تيتا عمرها ما فشلت تعوضني عن كل اللي شوفته وتفرحني طول الوقت وتحسسني بالآمان، هي ملجأ وركن مريح كدا ليا ديمًا بهربله من قسوة العالم الشرير دا. كملنا القعدة كلام وحكاوي وخلصت بعد ما إتغدينا وحلًِينا بكيكة البرتقال المميزة بتاعتي.. وبمجرد ما دخلت أوضتي صورت الشنطة وبعتها بشغف لـ أمير وكتبتله تحتها "شوفت تيتا عملتلي إيه!" وكان رده بمنتهى البرود.. "حلوة" ولوهلة حسيت بـ إنطفاء شغفي اللي كنت بتكلم بيه وتلاشي فرحتي البادية ليا بمجرد رده البارد فـ أتكلمت بمحاولة لـ فتح كلام : "هو فيه حاجة؟" كتبلي إنه هيرن عشان عاوزني في موضوع وفعلًا ثواني ورن فـ رديت وحِسي الإستشعاري بيقولي إنه هيقول كلام مش هيعجبني خالص!.. _ أمير؟ - ليلىٰ! _ مالك؟ إنت كويس - أه، بس كنت عاوز أكلمك في موضوع كدا إتنهدت دلالة على إني مستنية كلامه فـ إتكلم : بخصوص جدتك.. إبتسمت بسخرية وكأنه قدامي لإني للأسف عارفة الجُملة الجاية فـ كمل _ أصل.. ماهو.. - إتكلم يا أمير دوغري! _ جدتك مش هينفع تقعد معانا في البيت و.. قطعت كلامه بعصبية وعليت صوتي في كلامي : تاني يا أمير؟ كام مرة أقولك إلا دي؟ دانا مطلبتش منك حاجة غيرها، قولتلك بدل المرة ألف إنها حياتي ومن غيرها أمـ.ـوت!.. كملت كلامي بنبرة أكثر إستسلام : أرجوك، عشان خاطري إلا هي.. نفخ بضيق في قوله : ليلى، متصعبيش عليا الموضوع، أنا عاوز حياتنا تكون برايفت، وجدتك هتنهي الخصوصية دي، أنا عاوز مستقبلنا ميبقاش فيه غيري وغيرك، مش عاوز حد معانا!.. هبقى مضطر في الراحة والجاية أعمل حسابها في كل خطوة في حياتنا ودا مرهق ليا _ طب ومفكرتش فيا؟؟ بطل أنانية شوية وفكر من ناحيتي شوية، عافر عشاني! سكت فـ سكت معاه وقلبي بيقولي إن الحاجة الوحيدة الصح اللي أعملها دلوقتي إني أمتحنه وأشوف مقدار غلاوتي عنده، يا ترى هيحاول عشاني، ولا؟ _ أمير، أنا مش هتجوز من غير ما تيتا تقعد معانا في الشقة! قولتها على دفعة واحدة عشان مرجعش في كلامي في النص فسكت كتير أوي وبعدين همس _ نتكلم بكرة يا ليلى.. قالها وقفل الخط في وشي! يمكن مكانش فيه حاجة مسيطرة عليا وقتها غير الذهول والصدمة بس.. خليني أخد الريسك وعِند بعِند بقى، والبادي أظلم. صحيت تاني يوم مرهقة والخمول مُحتلني بشكل أقل ما يُقال عنه إنه بشع.. أنا ليه خايفة كدا؟ وليه مش عارفة أتخيل ولو لوهلة إن حكايتنا تنتهي بالفشل؟ ليه؟ قعدت أسأل السؤال دا لنفسي طول الطريق وأديني أهو في الكافية اللي إتفقنا عليه ومستنياه ييجي، وبالمناسبة.. دا أول مكان إتجمعنا فيه. إستنيته كتير وبعد نص ساعة إنتظار البيه شرف، ومع كل خطوة كان بيخطيها ناحيتي كان قلبي بيمو.ت في الثانية ألف مرة، فكرة إنك في عدّاد المو.ت دي طلعت متعبة جدًا يا جماعه، هتقولولي فين المو.ت هقولكم بعده عني أشد من المو.ت، بُعده عني زي ما حد ييجي يسلب مني الحياة وما فيها كدا، أنا.. أنا بنتهي. قعد قدامي ولأول مرة مش قادرة أشوف في عيونه الحب والشغف اللي كنت بشوفه زمان، مش قادرة أشوف نفسي في عيونه من لمعتها كل ما تلمحني، مش قادرة أشوف أمير اللي أعرفه! إتنهد بتعب وبعدين بصلي بتشويش قبل ما يتكلم : إزيك يا ليلى _ مش كويسة هز راسه وكأنه كان متوقع الإجابه فـ غصبًا إتكلم مرة تانية : ولا أنا.. بس إنتي في إيدك تغيري كل دا رفعتله حاجبي بإستنكار وقولت : أنا مش جاية هنا عشان أغير كلامي، دا قراري أنا.. أنا كنت جاية عشان أسمعك إنت. أحنى راسه لتحت فكملت كلام وشعور القهر الوحيد المسيطر على روحي : أنا عملت كل حاجة عشانك، إتنازلت كل التنازلات الممكنة، ضحيت بكل ما يمكن التضحية بيه، أنا مش بس إتراجعت كتير لأجلك أنا كمان كنت معتمداك في أي قرار في حياتي، كنت شايفاك القرار الأول والأخير، كنت يا أمير! فوقت من ذكرياتي المؤلمة في كلامي معاه على صوته الساخر : قال يعني كان غصب عنك؟ جذب إنتباهي بجملته فـ بصيتله بتيه عشان يكمل فقال : أنا مغصبتكيش على وجودك معايا، مش كفاية موافق إني أتجوز واحدة كنت ماشي معاها؟ وللحظة دماغي إتشلت حرفيًا وأنا مش قادرة أستوعب حتى هو بيتكلم على مين وليه، هو قصده عليا أنا؟ أكيد ميقصدنيش صح! إتكلمت بنبرة مهزوزة عن سابقها : واحدة كنت ماشي معاها؟ _ أه.. ومين بيقبل يرتبط رسمي بواحدة سلمتله قلبها قبل كدا.. مش يمكن عملتيها مع غيري وعاملة عليا الشريفة وخلاص؟ هزيت راسي بنفي ودموعي بتنزل لا إراديًا من الصدمة وأنا بردد : أنا يا أمير؟ أنا!، إنت أكتر حد عارفني كويس، إزاي تقول كدا، إنت.. إنت كسرت الحاجة الوحيدة اللي حلوة جوايا! قولت أخر كلمة بنبرة أشبه للصريخ وتقريبًا كل اللي في الكافية كانت نظراتهم متعلقة بينا، وغالبًا كان كل نظراتهم متعلقة بين الحزن وال.. شفقة! مقدرتش أتحمل أكتر من كدا وبسرعة اميت حاجتي من على الترابيزة وقومت، أنا خلاص مبقاش ليا مكان هنا، وتحديدًا معاه. قومت وقفت وكنت لسه بلف ناحية الباب لاقيت إيده على كتفي وكأنه إستوعب اللي عمله، فـ حاول يصلح ولو جزء من اللي قاله واتكلم : ليلى أنا.. أنا مقصدش أنا أسف ولله، أنا... مكملش كلامه ولا أنا كملت في سماعي لُه ولا إراديًا نزلت بكفي على وشه، أصل انا طول عمري بسمع وبقول حاضر، ودي النتيجة! حط إيده على خده من الصدمة فـ همست بصوت مليان إحتقار وإشمئزاز منه : أنا بكرهك، وبكره الصدفة اللي عرفتني على واحد واطي زيك.. إبتعدت خطوتين وكنت لسه همشي فـ رجعت مكاني تاني وأنا حاسة إن دا مش كفاية، وبمرونة مسكت كوباية القهوة اللي طلبها في أول القعدة وحدفتها عليه بدون أي ذرة عقل، وفعلًا خبطت فيه بعد ما إتدلقت على هدومه فإبتسمت وسط كلامي : دلوقتي بس عرفت إنت ليه من عُشاق القهوة، عشان إنتوا الإتنين بوشين زي بعض.. خلصت جملتي وطلعت من الكافية جري وكل اللي مسيطر على تفكيري بس "وبعدين"؟ فضلت أعيط طول الطريق وبالرغم من وجع قلبي اللي لا يحتمل، إلا إني ولأول مرة أحس إني روحي بالنقاء دا، لأول مرة أحس إني مرتاحة ولأول مرة أحس بحُريتي، وكأنها كانت مسلوبة مني طوال السنين اللي فاتت وأنا اللي مُغيبة وراه. وصلت البيت وبمجرد ما إتفتح الباب جريت على حضن تيتا وأنا رامية كل حمولي عليها، عيطت، لأ عيطت كتير أوي.. لدرجة إني للحظة حسيت إنها ممكن تكون نهايتي!، ولكن كنت بصبر نفسي بـ"لعلّه خير"، ويمكن دي مجرد بداية مش أكتر! خلصت كتابة وقفلت النوت بوك وأنا بتنهد للمرة الألف، سنتين مرُّوا مرور الكِرام على اليوم دا ولسه فاكره تفاصيله وكأنه إمبارح، والمضحك هنا إن بعدها بشهر عرفت إنه خطب لـ واحدة من صحابنا في شلة الجامعة، مضحك أوي صح؟ _ ليل.. بصيتله بعد ما حاولت أرسم على وشي إبتسامه حتى لو كانت مزيفة ورديت : نعم يا عيسى _ سرحانة في إيه؟ - في اللا شيء، عادي. بصلي شوية وهو ساكت وبعدها بدأ يتكلم تاني : إنتِ ليه مفكرتيش ترتبطي لحد دلوقتي، أقصد.. من المتوقع إن حد ناجح زيك يكون عنده شريك حياة مسحت على وشي بلا مبالاة وقولت : غلط، الصح إنك تبني نفسك الأول وبعدين تدور على شريك الحياة، لكن غير كدا هتفضل في خانة المظلومين والمقهورين طول العمر، الدُنيا دي غابة يا عيسى، وقانون الغابة إن القوي بياكل الضعيف، فـ لو معرفتش تكون أقوى حد فيها تأكد إن هييجي يوم وتتاكل. _ وبنيتي نفسك؟ - يعني.. بحاول _ طب مش ناوية تفكري في شريك الحياة بقى؟ عيوني برقت من صدمة ووقاحة كلامه فـ بسرعة إتكلمت بتوتر : أنا.. أنا لازم أروح _ يعني تيتا معندهاش شاي يتشرب يعني؟ ربعت إيديا بترقب لكلامه وقولت : لا معندناش _ طب سكر؟ _ لأ بردو - خلاص مش مشكلة هجيب أنا الشاي والسكر مش هنختلف أوي في التفاصيل دي سندت على المكتب بإيدي وكأني بستمد منه القوة وقولت : عيسى، أنا فاهماك كويس بس.. بس مينفعش، أنا لا أصلح لأي علاقة بشرية على الإطلاق، يعني بالنسبالي تعاملي مع الكلاب بقى أكتر من البشر اليومين دول. ضحك لكلامي وعقب عليه : كلاب؟ متشكرين يا ستي قعدت شوية عشان أستوعب اللي قولته وبمجرد ما فهمت إنطلقت ضحكاتي اللي بتتخبى ديمًا ورا ستار الجمود ويمكن دي أول مرة أضحك فيها في الشغل وبالشكل دا! بصلي في وسط ضحكي بنظرة أنا عارفاها كويس، أو يمكن كنت مخدوعة فيها.. دي، دي نظرة حنين! وأنا أحسن من يحس بمشاعر اللي حواليه، أصل نفس النظرة دي كانت موجودة من سنين قليلة، بس صاحبها كان مختلف، ويمكن المرة دي قادرة ألتمس فيها الصدق أكتر ومين قال الزمن مبيعلمش؟ الزمن بيعلِّم فينا حاجات، وبيعلمنا حاجات أكتر.. قدرت أكون أكتر نضج وأكتر إستيعاب للي حواليا، قدرت أفهم إن مش كل الناس طيبين وبجناحات، دانا بس اللي كنت ساذجة. قطع تفكيري صوته الشاجن : ليلى، أنا مش القيس اللي هيجيلك على حصانه الأبيض وينقذك من وسط اللي انتي فيه، بس أنا عيسى اللي هقف معاكي ونواجه اللي انتي فيه سوى! رمشت بعيني أكتر من مرة عشان أطرد الدمعات اللي إتجمعت فيها أثر كلامه، وبهدوء خدت نفس طويل قبل ما أتكلم : أنا لا أصلح صدقني، إنت إختارت الشخص الغلط - ومين قال، مش يمكن مفيش مجال للصدفة واللي جمعنا القدر؟ _ عيسى أنا مُحطمة! طبطب على إيدي بكفه وهمسلي : وأنا جيت عشان ألملم بقاياكِ وأبني بيها ليلى جديدة، ليلى ليا أنا وبس!. "قد تكون قصة القيس وليلته إنتهت فاشلة ولكني جِئتُ لأخلق قصة أخرى، بعنوان 'أبصرتُ خطاياك فأحببتها، وألِل مُحِب عُذرًا خاصةً بعدما إلتقى مُستنجدًا بحبيبه! بــ قلمي #أمنية_حلمي_بـلانـڪا #حواديت_الليل

مقالات ذات صلة

كونت في فرح

سلسلة العوض ج2 .حكايات شروق خالد

اليتيمة ج1 حكايات شروق خالد

تحدي المليون جنيه الجزء الثاني حكايات شروق خالد

بنت خالتك

واحدة متجوزة

اترك تعليقاً إلغاء الرد