انجي الخطيب
حماتي رمت هدومي في الشارع وقالتلي: خلص زمن طيبتي.. الشقة دي بقت بتاعة عيلتنا مش بتاعتك!”
حماتي رمت هدومي في الشارع قدام العمارة، والهدوم والشنط متبعثرة على الرصيف، وبصتلي بمنتهى الثقة وقالت:
— خلص زمن طيبتي يا نجلاء… الشقة دي بقت بتاعة عيلتنا، مش بتاعتك!
جوزي كان واقف جنبها، وفي إيده عقد بيع وورق قال إنه “سند ملكية” يثبت إن الشقة بقت باسم أمه.أنا ماصرختش، ولا حاولت أتشاجر معاهم.بصيت للورق، وبعدين بصيت لجوزي وحماتي، وقلت بهدوء:
— خلاص… خلي الشرطة تيجي.
لكن اللي محدش كان متوقعه، إن لما الضابط مسك الورقة ومسح الكود اللي عليها بالموبايل، ظهر سر قلب الخناقة كلها لقضية أكبر بكتير…#انجي_الخطيب
الضابط مسك الموبايل وقرب الكاميرا من الكود، ثواني وسكت، وشها اتغير تماماً وعينيه وسعت وهو بيبص لشاشة التليفون وبعدين يرفع عينيه يبص لحماتي وحسين جوزي.
حسين بلع ريقه وحماتي حطت إيدها في وسطها بتوتر تحاول تداريه بصوت عالي:
— خير يا باشا؟ الورق مظبوط وعليه أختام وشركات ومصالح حكومية، الشقة دي ملكي بالقانون ورمي حاجتها في الشارع ده من حقي!الضابط ما فردش ضهره، قرب خطوة ناحية حسين وقاله بصوت واطي بس يرعب:
— الأختام اللي على العقد دي يا معلم… دي أختام مزورة، والكود ده مطلعلي بيانات شقة تانية خالص في منطقة تانية ومباعة لثلاث أفراد غيركم… والأدهى بقى، إن الورقة دي طالعة من شبكة تزوير ونصب عقاري إحنا بنتدور عليها بقالنا شهرين!
حسين وشه اتخطف وبقى لون الورق اللي في إيده، رجليه ما شيلتوش وقعد على السلم، أما حماتي فشهقت بصوت طالع بالعافية:
— يا مري! نصب إيه وتزوير إيه يا باشا؟ ده حسين ابني بايعلي الشقة ومستلم مني ثلاثمية ألف جنيه شقا عمري كله من الخليج!
حسين خبى وشه بين إيديه وبدأ يعيط بالصوت:
— يا أمي الحقيني… صاحب المحل اللي جنبي هو اللي جابلي المحامي ده وقالي هيظبطلك العقد ويخلي الشقة باسم أمك من غير ما مرتك تحس ولا تطلب حقها… قالي ده عقد رسمي ومش هيتكشف!الضابط اتنهد ونادى على العسكري:
— هاتلي الواد ده على البوكس يا عسكري، هات حسين ده وهات معاك الورق كله… وأنتِ يا حجة، حصلين على القسم عشان تعملي بلاغ في اللي نصبوا عليكِ وخدوا شقا عمرك، أو تثبتي إنك شريكة مع ابنك في تزوير أوراق رسمية.
