سر القلادة الفضية ج 2 حكايات شروق خالد
دومينيك خطف المسدس من إيد فينسنت، وجري ناحية الباب وهو بيزعق: «باولي! جهّز العربيات حالًا! محدش يتحرك من غير سلاح، والليلة دي محدش هينام غير لما نعرف يوسف فين!» كنت واقفة في نص الصالة، رجلي مش شايالاني، وعقلي مش قادر يستوعب أي حاجة.
أخويا!طلع ليا أخ فجأة، بعد سبعة وعشرين سنة عشتهم وأنا فاكرة إني وحيدة، ودلوقتي ممكن يكون بيمــ,,ـــــوت وأنا حتى معرفش شكله الحقيقي ولا صوته!جريت ورا دومينيك ومسكت دراعه.«أنا جاية معاك.» لف ناحيتي بعصبية.«مستحيل.» «ده أخويا!» «وعشان هو أخوكي، مش هسمحلك تدخلي نفسك في خطر.
» زعقت فيه: «إنت فاكر إنك الوحيد اللي من حقه يخاف على الناس اللي بيحبهم؟! ده أخويا، حتى لو معرفوش، حتى لو عمره ما شافني، أنا مش هقعد هنا مستنياه يرجعلي في كفن!» دومينيك بصلي بنظرة طويلة، وكأنه بيحاول يقرر إذا كان يقدر يمنعني ولا لأ.
وبعدين قال لفينسنت: «هاتلها سلاح حماية، وخلي بالك منها طول الطريق.» بصيتله بصدمة.«سلاح إيه؟! أنا عمري ما مسكت مسدس في حياتي!» رد وهو بيتحرك ناحية الباب: «يبقى الليلة دي هتتعلمي إزاي تحمي نفسك.» بعد حوالي عشرين دقيقة، كنا بنجري بالعربيات في شوارع القاهرة، وسط الزحمة اللي بدأت تقل مع دخول الليل.
دومينيك كان قاعد جنبي، ماسك موبايله، وبيحاول يوصل ليوسف، لكن تليفونه كان مقفول. كل شوية كان بيبص في الساعة، ويضغط على فكه بعصبية. وأنا كنت ببصله من وقت للتاني، لحد ما مقدرتش أستحمل وسألته: «إنت ويوسف أصحاب من زمان؟» فضل باصص قدامه وهو بيرد: «من أكتر من عشر سنين.
قابلته أول مرة في شركة أبوه، وكان أصغر مني بسنتين. كان ذكي، هادي، ومش بيحب يدخل في مشاكل.» سكت لحظة، وبعدها كمل: «لما أبوه اختفى، يوسف كان عنده خمس سنين. اتربى في بيت عيلة تانية، واتقاله إن أهله ماتوا في دــ,,ـــــادثة.
مكنش يعرف أي حاجة عن أصله الحقيقي.» قلبي وجعني.«يعني هو كمان عاش عمره كله محروم من أمه؟» دومينيك هز راسه.«أيوه.» «طب إزاي معرفتوش إنه ابن محمود السيوفي؟» «لأن محمود كان مخبي وجوده عن الكل. حتى اسمه اتغير وهو صغير، وكل الأوراق اللي كانت ممكن تكشف هويته اختفت.
» بصيتله بصدمة.«ومين اللي أخفاه؟» دومينيك سكت شوية، وبعدها قال: «دي الحاجة اللي يوسف كان بيحقق فيها قبل ما يتخطف.» الكلمة الأخيرة خلتني ألف ناحيته بسرعة.«يتخطف؟! إنت لسه قايل إنه في خطر!» دومينيك بصلي.«أنا متأكد إن اللي حصل مش دــ,,ـــــادثة عادية.
