حكايات شروق خالد ج1

محمود؟!أخويا كان عارف إيه؟ وإيه اللي حصل يوم ما سلوى سابت البيت؟وليه أخويا مات من غير ما يقولي أي حاجة؟رفعت عيني لبناتي، وقلت بصوت واطي:
«لازم أروح لسلوى بنفسي».لكن مريم مسكت إيدي بسرعة وقالت:
«استنى يا بابا، فيه حاجة إحنا لسه مقولنهاش».

بصتلها، فقالت وهي بتعيط:
«إحنا لما قابلنا ماما للمرة التانية، كانت فيه ست كبيرة قاعدة معاها، ولما عرفت إننا بناتك، قامت من مكانها وفضلت تبص لنا بصدمة، وبعدها قالت لماما جملة غريبة».سألتها:
«قالت إيه؟»
مريم أخدت نفس طويل وقالت:
«قالتلها: يعني البنتين لسه عايشين؟!»
يتبع…

#حكايات_شروق_خالدفضلت باصص لمريم كأني مش قادر أستوعب اللي سمعته.«يعني إيه البنتين لسه عايشين؟! هي الست دي كانت فاكرة إن بناتي ماتوا؟!»
منة هزت راسها وقالت:
«إحنا سألناها يا بابا، بس أول ما ماما سمعت السؤال، وشها اتغير، وقامت زعقت للست وقالتلها تسكت.

وبعدها طلبت مننا نمشي، وقالت إنها هتتصل بينا وتحكيلنا كل حاجة».حسيت إن الدم بيغلي في عروقي. أنا طول عمري كنت فاكر إن سلوى سابت البيت لأنها مكنتش عايزة تعيش مع بنتين عندهم إعاقة، وكنت بكرهها على القرار ده، لكن دلوقتي بدأت أشك إن فيه حاجة تانية حصلت، حاجة محدش قالي عنها.

قمت من مكاني، وخدت مفاتيح عربيتي، وقلت للبنات:
«إنتوا هتيجوا معايا».مريم بصتلي بقلق.«هنروح فين يا بابا؟»
رديت وأنا بفتح باب الشقة:
«إسكندرية. أنا مش هستنى تليفون من حد. أنا عايز أعرف الحقيقة بنفسي، ومش همشي غير لما أفهم كل حاجة».منة حاولت تهديني:

«طب استنى شوية، إحنا لسه في أول اليوم، وإنت متعصب وممكن تتصرف بطريقة تندم عليها».بصيتلها وقلت:
«أنا مش رايح أضرب حد ولا أعمل مشكلة. أنا رايح أعرف ليه أخويا اسمه موجود في رسالة أمكوا، وليه فيه واحدة غريبة فاكرة إن بناتي ماتوا وهما لسه عايشين!».

خرجنا من البيت، وساعدت البنات يركبوا العربية، وبعدها اتحركت من القاهرة ناحية إسكندرية. طول الطريق، مكنتش قادر أبطل تفكير. محمود، أخويا الصغير، كان أكتر شخص وقف جنبي بعد ما سلوى مشيت. كان بييجي يزور البنات كل أسبوع، ويجيب لهم لعب وهدايا، ويساعدني في مصاريف العلاج لما الدنيا تضيق بيا.

كان دايمًا يقولي:
«يا أحمد، البنات دول أمانة في رقبتنا، وإنت مش لوحدك طول ما أنا عايش».طب لو كان عارف الحقيقة، ليه سكت؟ وليه خد السر معاه للقبر؟بعد حوالي تلات ساعات، وصلنا العنوان اللي البنات كانوا محتفظين بيه.