بنتي كانت في العمليات، ج1 .حكايات شروق خالد

يا ملك، ردي عليا يا حبيبتي!»
لقيتها قاعدة ورا، وشها شاحب، ودموعها نازلة، وإيديها الصغيرة بتترعش. جريت عليها وحاولت أفتح الباب، ولما قدرت أوصل لها، مسكت إيدي بكل قوتها. قالتلي بصوت ضعيف:
«ماما، ضهري بيوجعني أوي».

حسيت إن قلبي اتخلع من مكانه.«معلش يا روح قلبي، الإسعاف جاية، استحملي شوية بس».فضلت ماسكة إيدها، وأنا بعيط وبحاول أطمنها، مع إني كنت من جوايا بمــ,,ـــــوت من الخوف. ولما الإسعاف وصلت، المسعفين شالوها بحرص، وأنا ركبت معاها، وما سبتش إيديها غير لما الدكتور اضطر ياخدها مني عشان يقدر يفحصها.

في الطريق للمستشفى، ملك بصتلي وقالت:
«ماما، هو أنا عملت حاجة وحشة؟»
بصيتلها بصدمة.«ليه بتقولي كده يا حبيبتي؟»
قالت وهي بتعيط:
«عشان ضهري بيوجعني، وأنا خايفة أمــ,,ـــــوت وأسيبك لوحدك».صرخت من جوايا، لكني قربت منها وبوست جبينها.«بعد الشر عليكي يا قلب ماما.

إنتِ هتبقي كويسة، وهترجعي تجري وتلعبي وترسمي، وأنا هفضل جنبك لحد ما تخفي، فاهمة؟»
هزت راسها، وغمضت عينيها من شدة الوجع. ولما وصلنا مستشفى كبير في القاهرة، الدكاترة خدوا ملك على الطوارئ فورًا، وبعد الفحوصات والأشعات، خرج الدكتور سامح عبد الرحمن يطلب مني أقعد معاه.

كنت واقفة قدامه، إيدي بتترعش، وقلبي بيدق بسرعة. قال بهدوء:
«يا مدام ندى، بنتك عندها إصابة خطيرة في أسفل العمود الفقري، ولازم تدخل عملية جراحية دلوقتي. العملية دقيقة وصعبة، ومحتاجين نتــ,,ـــــحرك بسرعة».مسكت إيده وقلتله:
«يا دكتور، أرجوك اعمل أي حاجة.

أنا ماليش غيرها، دي بنتي الوحيدة».بصلي بحزن وقال:
«إحنا هنعمل كل اللي نقدر عليه، بس لازم تكوني عارفة إن فترة التعافي ممكن تكون طويلة، ومش هنقدر نحكم دلوقتي إذا كانت هترجع تحرك رجليها بشكل طبيعي ولا لأ».حسيت إن رجلي مش شيلاني.

قعدت على أقرب كرسي، وحطيت إيدي على وشي، وفضلت أردد:
«يا رب، بنتي يا رب. خد من عمري واديها، بس متوجعهاش».بعد دقائق، خرجت ممرضة وقالت إنهم هيبدأوا العملية. طلبت أشوف ملك لدقيقة واحدة. دخلت لها، لقيتها على الترولي، ووشها مرهق، لكنها أول ما شافتني حاولت تبتسم.

مسكت إيدي وقالت:
«ماما، متعيطيش. أنا هبقى كويسة، وهجيبلك البيت الموف اللي وعدتك بيه».ماقدرتش أتكلم. انحنيت عليها وبوست راسها، وقلت:
«أنا مستنياكي يا ملك. أول ما تخرجي، هنعمل كل اللي نفسك فيه».وبعدها خدّوها، والباب اتقفل بيني وبينها.