بنتي كانت في العمليات، ج1 .حكايات شروق خالد

إنتِ عارفة إن ماما وبابا بيعتمدوا عليكي، وإنتِ فجأة قررتي توقفي كل حاجة عشان مكالمة حصلت بينك وبين ماما؟»
بصيتلها وقلت:
«مكالمة؟ إنتِ شايفة إن اللي حصل مجرد مكالمة؟ إنتِ كنتِ عارفة إن ملك في العمليات، ومع ذلك فضلتي في حفلتك، وماما بدل ما تطمن على حفيدتها طلبت مني أسيبها وأروح أخدم الضيوف!

»
سارة عقدت دراعاتها وقالت:
«وأنا ذنبي إيه إنك قررتي تعملي مشكلة في يوم مهم بالنسبالي؟»
في اللحظة دي، حسيت إني أخيرًا شايفة أختي على حقيقتها، من غير ما أبرر لها، ومن غير ما أفتكر كل المواقف القديمة اللي كنت بحاول أقنع نفسي إنها بتحبني بس مش بتعرف تعبّر.

قلت لها بهدوء:
«إنتِ مالكيش ذنب في الدــ,,ـــــادثة يا سارة، ولا أنا بلومك على اللي حصل لبنتي. أنا بلومك على إنك عرفتي إنها بين الحياة والمــ,,ـــــوت، واخترتي تتريقي عليا بدل ما تسألي عليها».فتحت بقها عشان ترد، لكني كملت:

«أما الفلوس اللي كنت بساعدكم بيها، فدي كانت بمزاجي، ومن النهارده أنا قررت أوقفها. مش هطلب منكم فلوس، ومش هاخد منكم حاجة، بس كمان مش هفضل مسؤولة عن مصاريفكم وأنا وبنتي محتاجين نعيش في أمان».

بابا ضــ,,ـــــرب كف بكف وقال:
«يعني إيه مش هتساعدينا؟ إنتِ بنتنا، ودي مسؤوليتك!»
بصيتله باستغراب.«مسؤوليتي؟ أنا مسؤوليتي بنتي يا بابا. أنا عمري ما قصرت معاكم، وكنت بساعدكم من غير ما أتكلم، لكن محدش فيكم سأل نفسه أنا بعمل ده إزاي، ولا حتى إذا كنت محتاجة مساعدة».

ماما رفعت صوتها:
«إحنا اللي ربيناكي وصرفنا عليكي، وده أقل واجب تعمليه تجاه أهلك!»
الكلام ده وجعني، لأنه رجعني لسنين طويلة كنت فيها بحاول أرضيها، وأثبت لها إني بنت كويسة وتستاهل حبها. لكن المرة دي، ما سكتش. قلت لها:
«وأنا عمري ما أنكرت فضلكم عليا يا ماما.

ولا عمري قلت إنكم ما عملتوش ليا حاجة. بس التربية مش فاتورة أفضل أسددها طول عمري، ومش معناها إني أقبل إنكم تسيبوا بنتي في أصعب لحظة في حياتها، وبعدين تيجوا تحاسبوني على فلوسي».سكتت ماما، ووشها اتغير. أما سارة، فكانت باصة لي بغضب، وبعدها قالت:
«إنتِ اتغيرتي أوي يا ندى».

هزيت راسي وقلت:
«لأ يا سارة، أنا بس بطلت أقبل اللي كنت بقبله زمان».وقبل ما حد فيهم يرد، باب العناية اتفتح، وخرجت ممرضة بتدور عليا.«مدام ندى؟»
جريت ناحيتها.«أيوه، أنا هنا. بنتي فيها حاجة؟»
ابتسمت وقالت:
«متقلقيش، ملك فاقت وبتسأل عليكي.