«ماتقوليش لحد إني صحيت#حكايات_شروق_خالد
بصيت على إيده.
وبعدين على نادين.
وقلت:
«طيب… لو أنا عارفة، هتعملي إيه؟»
نادين ضحكت.
«هخليكي تختفي.»
«إزاي؟»
«حادثة عربية. سرقة. هروب. أي حاجة.»
سكتت لحظة، وبعدين قالت:
«إنتِ أصلاً واحدة محدش يعرفها. أم مطلقة، محتاجة فلوس، وجيتي تشتغلي عند راجل غني عشان المرتب. لو اختفيتي، مين هيسأل؟»
كلامها وجعني.
بس في اللحظة دي افتكرت يونس.
وقلت:
«أنا ممكن أكون غلبانة، بس مش هسيب ابني يتربى من غير أم.»
نادين قربت مني.
«يبقى اسمعي الكلام.»
قبل ما تلمسني، ياسين حرّك إيده فجأة.
الكوباية اللي جنب السرير وقعت على الأرض واتكسرت.
نادين لفت بسرعة.
وأنا في نفس اللحظة جريت ناحية الباب.
خرجت.
سمعت نادين بتصرخ:
«مريم!»
جريت في الطرقة بكل قوتي.
نزلت السلم.
لكن فجأة شفت سيف طالع من الناحية التانية.
وقفت.
هو وقف قدامي.
وقال:
«خلصتي لعب؟»
رجعت خطوة.
لقيت نادين ورايا.
اتحاصرت.
سيف قرب.
«هاتِ الفلاشة.»
قلت:
«مش معايا.»
مد إيده.
«مريم… آخر مرة هقولها.»
بصيت له بثبات.
«مش هديهالك.»
وشه اتغير.
مسكني من دراعي.
لكن قبل ما يعمل أي حاجة، سمعنا صوت عربية الشرطة برا الفيلا.
سيف ساب إيدي فجأة.
نادين بصتله بصدمة.
«شرطة؟»
سيف قال:
«مستحيل.»
جريت ناحية الباب.
لكن قبل ما أفتحه، سيف شدني وقال:
«استني!»
قلت:
«إبعد عني!»
الباب اتفتح.
ودخل اتنين ضباط.
واحد منهم قال:
«مريم عبدالسلام؟»
قلت:
«أيوه.»
«إنتِ اللي اتصلتي بينا؟»
اتخضيت.
«أنا؟»
بص الضابط لسيف.
«إحنا جالنا بلاغ من رقم مسجل باسم ياسين الجبالي.»
سيف اتجمد.
نادين بصت له.
وأنا بصيت ناحية أوضة ياسين.
الضابط قال:
«فين الأستاذ ياسين؟»
سيف حاول يتكلم:
«عمي حالته خطيرة وممنوع حد يدخل عليه.»
الضابط رد:
«إحنا محتاجين نشوفه.»
سيف وقف قدام السلم.
«الدكتور قال ممنوع.»
الضابط قرب منه.
«إنت مين؟»
«أنا سيف الجبالي… ابن أخوه.»
«وسيف الجبالي ده مين؟»
طلع بطاقة.
الضابط بص فيها.
وبعدين قال:
«تمام. ابعد عن السلم.»
سيف ما اتحركش.
الضابط رفع صوته:
«قلت ابعد.»
سيف اضطر يتحرك.
طلعت أجري قدامهم.
دخلت أوضة ياسين.
لقيته مكانه.
لكن عينه كانت مفتوحة.
وأول ما شافني، رمش مرتين.
الضابط قرب منه.
«أستاذ ياسين، حضرتك سامعني؟»
ياسين رمش.
الضابط بصلي.
«هو واعي؟»
قلت:
«أيوه.»
سيف دخل وراهم.
وقال بسرعة:
«لا، دي ممرضة وبتتوهم. عمي في غيبوبة من أسابيع.»
